12 Angry Men (1957)

Film / 30. april 2007
4/5

Tolv jurymedlemmar held skjebnen til ein ung gut i hendene. Kva vil dei gjere?

Først og fremst vil dei kome seg heim, så elleve av dei stemmer for skuldig. Dette skjer heilt i starten av filmen, og eg ser ikkje på det som ei stor avsløring å gi denne opplysninga i ei filmmelding. Ein gjenverande herremann, som utanfor kamera går under namnet Henry Fonda, stemmer i mot.

Vidare følger ein lang diskusjon med høgt temperament om bevisvurdering, klargjering av personlege synspunkt og heile pakka.

Det skal godt gjerast å lage ein heil film utelukkande basert på samtale i eit rom. Miljøet i 12 Angry Men er eit enkelt rom, utanom opningsscena som er i ein rettssal. Når steinane først byrjar å rulle treng du ikkje anna enn snakking for halde interessa her, iallfall gjer ikkje eg det. Her er det livet til ein drapsmistenkt 18-åring det er snakk om, og korleis kan dei sende han i den elektriske stolen utan å diskutere først? Det er poenget til Henry Fonda-karakteren.

For å setje poenget med samtalefokuset på spissen: Mange gode tv-drama har mest snakking, i ulike miljø for å gi litt variasjon, men det er framleis snakking som skapar handlinga. Avvik finst i spenningsseriar, det vil eg ikkje utelukke, avvik finst. Men i stor grad er det mykje snakking.

12 Angry Men klarar å gjere jobben utelukkande ved at tolv sinte og engasjerte menn diskuterer ei drapssak i eit avsperra rom gjennom ein og ein halv time utan at det blir kjedeleg. Engasjementet mitt får temperaturen i hovudet mitt til å stige og eg opparbeider verkeleg meiningar om det som skjer på skjermen. 12 Angry Men er ingen passiv popcornfilm, tvert i mot, og aktiviteten han skapar gjer han til ein utruleg bra film.

12 Angry Men 1957 plakat - Filmdagbok

Regi

Sidney Lumet

Manus

Reginald Rose

Skodespelarar

Martin Balsam, John Fiedler, Lee J. Cobb, E.G. Marshall, Jack Klugman, Edward Binns, Jack Warden, Henry Fonda, Joseph Sweeney, Ed Begley

Sjangrar

Drama, Krim

Land

USA

IMDb

IMDb-side om 12 Angry Men

Forfattar