Christmas List

Christmas List er ein romantisk komedie som kom ut i 2016. Filmen er regissert av Paul A. Kaufman, og er ein julefilm frå Hallmark.

Grunnen til at valet falt på Christmas List som ein av julefilmane i år, var utelukkande at Alicia Witt spelar hovudrolla. I tre julefilmar hittil i år har ho strålt. Sjølv om forventningane til mesteparten av denne filmen var avgrensa, var forventningane til hennar innsats høg.

Filmen handlar om ei ung kvinne som har vakse opp med ei kontrollerande mor som alltid har vore ute etter perfeksjon. Alt den unge kvinna sjølv har hatt lyst til som barn var ei tradisjonell jul med heimelaga peparkakehus, ekte juletre og meir. Men det har ho aldri fått opplevd. No i vaksen alder har ho ikkje tenkt denne tanken på ei stund, men kjem over ei ønskeliste frå barndommen, og går inn for å oppfylle ho.

Christmas List framstår som ein lågbudsjettsfilm med mykje falsk snø, litt kunstig snø, få plasseringar og tonnevis med julepynt som skal sette oss i julestemning. Eg får ikkje så stor tru på Hallmark når eg ser desse produksjonane, men lar det gå når eg heller tenker på at dette skal ha kostnadsnivået til ein lang episode av ein serie. Tv er jo mediet.

Paul A. Kaufma er ein av få regissørar blant julefilmane til Hallmark som eg har sett noko av før. Om enn berre ein Lifetime-film som heiter Magic Beyond Words: The J.K. Rowling Story. Den filmen hadde meir for seg. Christmas List er stort sett preglaus.

Det som hevar denne filmen er ikkje overraskande Alicia Witt. Sjølv i ei passe kjedeleg rolle spelar ho med stil. Ho verkar noko sliten, men leverer likevel godt nok til at dette blir ei lita glede å følge med på. Motspelaren hennar er Gabriel Hogan. Desse to spelte også i lag i Christmas at Cartwright's, og spelar like godt i lag her som der.

Då det stort sett er Alicia Witt som lyser opp denne middelmåtige filmen, kan eg ikkje med handa på hjarte anbefale denne på noko anna vis. Dette er akkurat like enkelt og overflatisk eller meiningslaus som mangelen på oppfinnsemd i å velja tittel på filmen.

Christmas List 2016 plakat - Filmdagbok