Fast Times at Ridgemont High

Litt ut i filmen kjente eg igjen så mykje av handlinga at eg visste at eg måtte ha sett filmen før, men det gjorde ingenting å sjå han igjen.

Fast Times at Ridgemont High kjem i same sjanger som andre high school-komediar frå 1980-talet som eg har sett pris på før, på lik linje med fleire av filmane til John Hughes, og då spesielt The Breakfast Club.

Sean Penn er her noko av det styggaste eg har sett på film på ei stund, men heldigvis er både Phoebe Cates og Jennifer Jason Leigh med i massevis. Dessutan var det artig å sjå Judge Reinhold her berre få dagar etter han dukka opp i Seinfeld som Aaron, the close talker.

Når det kjem til denne type film så set eg ikkje så høge krav til anna enn dum og flau tenåringsforelsking. Det er noko med det å sjå folk dumme seg ut, men at dei likevel klarar seg så bra. Her er det Mark (Brian Backer) som er den dumme, men heldige usikre fyren. I Sixteen Candles og Weird Science var det Anthony Michael Hall. Ein high school-komedie frå 1980-talet utan denne type rollefigur er ikkje heilt det same.

Så gjenstår det å sjå om eg finn fram filmen igjen om nokon år. Eg trur at det er ein av dei filmane eg lenge har venta på å få sett, for så å finne ut etter å ha byrja med han at han allereie er sett.