
Inside the Mind of a Cat
Ein lett og småkos dokumentar som prøver å kikke inn i hovudet på katten. Men som helst berre skrapar litt i overflata. Inside the Mind of a Cat er først og fremst retta mot katteeigarar tenker eg, eller dei som vurderer å få seg ein pus. Det er mykje katt å sjå, og ein del artige fakta undervegs, men djupdykket uteblir.
Me får lære at kattar er atletiske takka vere fleksibel ryggrad, at dei har svært lite endra DNA over titusenvis av år, og at dei elskar tronge rom fordi det gjev tryggleik. Dokumentaren hintar til interessante biologiske og kulturelle aspekt, som purring i same frekvens som spedbarnsgråt, og skilnadar i kattepersonlegdom mellom ulike land. Alt dette er spennande, men berre så vidt rissa i.
Innimellom dukkar det opp sidespor som verken er spesielt relevante eller spesielt interessante, som gir ei kjensle av at filmen vil for mykje på ein gong. Som underhaldning ein roleg kveld funkar dette heilt fint, men du sit ikkje att med mykje meir enn du kunne ha funne i ei kort YouTube-video. Eit fint lite nikk til katteelskaren, men ikkje noko revolusjonerande.
Romey Norton legg meir vekt på det nyttige på Ready Steady Cut (readysteadycut.com). Ho meiner filmen er lett å sjå og kan gi katteeigarar konkrete tips til å forstå dyra betre, men sit òg att med ønsket om meir. Det passar med inntrykket mitt av ein dokumentar som fungerer best som ei enkel innføring. Kattane og dei små opplysningane held oss med selskap, medan dei større spørsmåla blir mindre utforska.
