
Manhunter
Manhunter er basert på boka Red Dragon av Thomas Harris, den første av bøkene hans med Hannibal Lecter.
Ein seriemordar drep barnefamiliar når det er fullmåne, og FBI har problem med å finne ei kopling. Dei hentar inn igjen ein tidlegare etterforskar, Will Graham (William Petersen), som har evne til å sette seg inn i tankegangen til drapsmenn.
Graham konsulterer blant anna med Dr. Hannibal Lecktor (Brian Cox), som i seinare bøker og filmadapsjonar fekk større roller. Lecktor er verktøyet til Graham for å igjen sette seg inn i måten seriemordarar og psykopatar tenker på.
Spenninga i filmen bygger på to truslar: At seriemordaren skal drepe igjen, og at psyken til Graham skal bryte saman under lasten det er å gå inn i den ekstreme tankegangen.
Musikken spelar ei stor rolle for stemninga. Allereie i første speleminutt markerer han seg. Og det var nesten som at eg der og då bestemte meg for at dette var ein god film. Dette viste seg å stemme. Manhunter gir ei stor innleving, har eit godt driv, interessante karakterar og held fram den gode musikken.
Skribenten på TSorensen 1001 Movie Blog (tsorensen1001.blogspot.com) set særleg pris på at jakta og etterforskingsarbeidet får meir plass enn dei grovaste detaljane. Han meiner filmen held merksemda på spora og på korleis Graham går inn i tankegangen til mordaren. Det er ei god side ved drivet eg likar. Stemninga kjem ikkje berre frå musikken, men også frå kjensla av at kvart nytt steg kan koste etterforskaren noko.
