
The Matchbreaker
Christina Grimmie døydde i 2016, berre 22 år gammal. Før det rakk ho å spele inn The Matchbreaker. Eg skulle gjerne følgt opp den innleiinga med at dette er ein god film. Det synest eg dessverre ikkje at han er.
Ethan Cooper (Wesley Elder) får betalt av foreldre for å øydelegge kjærleiksforholda til barna deira. Oppdraga blir vanskelegare då eit av dei fører han tilbake til Emily Atkins (Christina Grimmie), som han var forelska i som barn.
Det er eit opplegg for romantiske forviklingar, men gjennomføringa gir meg for lite. Eg får ikkje nok glede av komedien eller historia til at dette blir ei god oppleving. Omstenda rundt Christina Grimmie gjer at eg skulle ønske resultatet var betre.
På Box Office Revolution (boxofficerevolution.wordpress.com) får både komedien og skodespelet mykje ros. Skribenten saknar ei meir samansett historie, men er elles langt meir nøgd enn eg er. Me endar med ganske ulike inntrykk av kva filmen får til.
Eg vil gjerne ha noko godt å seie om denne eine langfilmen hennar. Det endrar ikkje opplevinga mi. Dette er ein svak romantisk komedie.
