Hopp til hovedinnhold
Plakat for Foo Fighters Sonic Highways (2014)

Foo Fighters Sonic Highways

Serie
5

Dave Grohl og resten av Foo Fighters tar oss med på ein rundtur i USA, frå by til by med musikktradisjon og musikkhistorie. I løpet av åtte episodar blir også åtte songar spelt inn i kvart sitt studio i desse byane.

Sonic Highways, som også er namnet på albumet, er ei nydeleg og variert reise. Interessante musikarar og personlegdommar blir intervjua og fortalt om, i mange sjangrar. Det handlar akkurat passe mykje om Foo Fighters til at serien i heilskap blir eit lite innblikk i dei også, men i stor grad er det inspirasjonen som tar merksemda.

Greg Cochrane på NME (nme.com) framhevar dei to første episodane som personlege utan å bli sjølvopptekne. Han meiner Foo Fighters gir plass til musikkmiljøa og menneska dei møter, før innspelinga samlar trådane. Det er nettopp denne balansen eg likar gjennom serien. Bandet gir turen ei retning, men får ikkje stå i vegen for alt det andre som gjer stadene interessante.

Eg er ikkje nødvendigvis så stor fan av dokumentarar som formidlar eit synspunkt, men inspirasjonen til Foo Fighters er i stor grad ein subjektiv sak, og formidlinga kan difor gjerne vere personleg. Med dette utgangspunktet kosa eg meg stort med Foo Fighters Sonic Highways, og tok det med ro med maks ein episode om dagen, før eg gledde meg til neste.

Som tv-dokumentar om musikk er sjangerblandinga som er gjort her fin, og fungerer godt sjølv om eg ikkje er blodfan av Foo Fighters.